Аксыда уулануудан каза болгондор мөөнөтү өтүп кеткен спиртти сууга аралаштырып ичкен болушу мүмкүн. Бул түрдүү божомолдору менен жергиликтүү тургундар бөлүшүүдө. Айтымдарында, мындай арзан баадагы алкоголь ичимдиктери Кара-Суу айылындагы дарыканалардын биринде сатылууда.
Андыктан каза болгондордун саны көбөйүшү мүмкүн деген кооптонуулары бар экен. Бүгүнкү күнү уулануудан 13 адам ооруканада дарыланууда. Ал эми 6 адамдын өмүрүн сактап калууга мүмкүн болгон эмес. Массалык уулануу боюнча экспертизанын жыйынтыгы чыга элек.