Франция президенти Эммануэль Макрон жана Орусия лидери Владимир Путин Петербург экономикалык форумунун алкагында жолугушту. Алар киберкылмыштуулук менен күрөшүү жана Украинанын чыгышындагы жаңжалды жөнгө салуу боюнча Минск келишиминин аткарылышын талкуулашты.
Үч саатка созулган сүйлөшүү учурунда АКШнын Иран боюнча өзөктүк келишимден чыгышы жөнүндө да сөз болду. Макрон келишимдин алкагында Тегеранды өз милдеттенмелерин аткаргыдай абалга жеткирүү керек деп эсептейт. Франция президентинин пикиринде, АКШнын санкцияларына карабай, европалык компаниялардын Иранда иштей берүүсү үчүн бардык ишти жасоо зарыл.
Макрон Сирия маселесине келгенде, жаңжалды чечүү жараянына аймактагы бардык державалар катышууга милдеттүү деген көз карашта.
Эки өлкө лидерлеринин жолугушуусу учурунда Орусия менен Франция ортосунда маданий мурас жана атом энергиясын тынч максатта колдонуу боюнча кызматташуу келишимине кол коюлду.