Курган-Төбө шаарындагы жардырууга айыпталган Шарифджони Зокир Жогорку Сот тарабынан өмүр бою эркинен ажыратылды. Соттун маалыматына караганда, 12-мартта Аскер прокуратурасы менен Хатлон гарнизонунун аскер сотунун алдындагы жардырууну Шарифджони Зокир менен анын мектепте окуган иниси Раджабджони Зокир жасаган.
Сот мындан тышкары Шарифджони Зокир ИМ экстремисттик тобунун идеаларынын жайылткан жана гомосексуалистти өлтүргөн деп тапты. Тажикстандын Жогорку соту 9-класстын окуучусу Раджабджони Зокирди 5 жыл түрмөгө кести. Бул кылмыш иши боюнча айыпталып жаткан дагы үч киши 13 жылдан 15 жылга чейин эркинен ажыратылды.
Курган-Төбө шаарында 12-март күнү кечинде облустук сот имаратынын алдында жардыруу болгон. Жыйынтыгында 67 жаштагы Хасанбой Рахмонов аттуу этникалык өзбек жараны мерт кеткен. Маркум жергиликтүү мектептердин биринде кароолчу болуп иштеген.
Тергөөчүлөр Хасанбой Рахмонов кокусунан окуянын курмандыгы болуп калганын билдиришкен. Алардын айтымында, жардырууда орусиялык аскерлер бутага алынган. Кылмыш ишин жасоого шектелип беш киши кармалган.
