Эл аралык француз радиосунун маалыматына караганда, кесиптик кошуундар тобу Бастилия аянтынан Италия аянтына чейин жүрүш жасашы керек болчу. Бирок демонстранттардын кыймылы жүрүшкө кошулган «Кара блок» кыймылынын активисттери тарабынан үзгүлтүккө учуратылган. Солчул радикалдар жолдогу дүкөндөр менен банктардын айнектерин талкалашып, таштанды челектерди өрттөшкөн. Башаламандыктар маалында жол жээгинде жайгашкан «Макдоналдс» ресторанына бөтөлкөгө куюлган өрттөнө турчу суюктук ыргытылган.
«Кара блок» 2017-жылы жайында Гамбургда «Чоң жыйырма» өлкөлөрүнүн лидерлери жолуккан күндөрү уюштурулган башаламандыктарга тиешеси бар экендиги менен белгилүү. Анда 70тен ашык полициячы жаракат алган.
