Бишкек менен Нарында коронавирус жуктурган эки бейтап каза болду

Кыргызстанда коронавирус жуктурган эки адам каза болду. Бул тууралуу саламаттык сактоо министринин орун басары Нурболот Үсөнбаев билдирди. «Нарын облустук ооруканасында бир бейтап каза болду. Ал 84 жаштагы аял киши. Бир топ убакыттан бери ооруп жүргөн экен. Апрель-март айларында эски ооруларынан жабыркап, улам медициналык мекемелерге барып турган. Эски оорулары козголуп, провизордук госпиталга алынган. Медициналык жардамдын жыйынтыгы болбой, ал реанимацияга жаткырылган. Медициналык жардам көрсөтүлүп жатканына карабастан ал кечээ каза болду. Андан анализ алып, ПЧР-тест менен текшергенде коронавирус жуктуруп алганы аныкталды. Анын сөөгү жерге берилди. Бейтап келген айылда эл арасында эпидемияга каршы иштер, эпидемиологиялык иликтөө жүргүзүлүүдө», — деди ал.

Анын айтымында, каза болгон экинчи бейтап 55 жашта болгон. «55 жаштагы бир бейтап Республикалык оорулар ооруканасында кайтыш болду. Ал 28-апрелде ооруканага түшкөн. Абалы оор болгондуктан реанимация бөлүмүндө жаткан. Дарылоого карабай ал бүгүн каза болду. Анын эски өнөкөт оорулары козголуп, дарылоо жыйынтык бербей каза болду», — деди ал.

Белгилей кетсек, Кыргызстанда 15-майга карата коронавирус жуктурган 29 жаңы учур катталды. Азыркы тапта өлкөдө коронавирус жуктурган учурлардын саны 1111ди түзөт. Алардын ичинен 745 адам коронавирустан айыгып, ооруканадан чыгарылган. Коронавирус жуктурган 14 адам каза болду.

Бул тууралуу маалыматты кенеңирээк НТСтин жаңылыктарынан көрө аласыздар.