Парламенттик кайра шайлоону белгисиз мөөнөткө жылдыруу боюнча Жогорку Кеңештин чечими баш мыйзамга каршы келбейт. Конституциялык палата дал ушундай корутунду чыгарды. Депутаттар кабыл алган чечимдин мыйзамдуулугунан күмөн санаган “Реформа” партиясы жана 2 жаран сотко доо арыз менен кайрылган.
Алардын белгилешинче, 22-октябрда Жогорку Кеңеш тарабынан шайлоо жөнүндө Конституциялык мыйзамдын эки беренесинин күчүн токтотуп коюу жөнүндө документтин кабыл алынышы ага карама-каршы келет. Бирок жоопкер тарап катары чакырылган Жогорку Кеңештин өкүлдөрү бул дооматтар менен макул болушкан жок.