Ферганада атасы уулуна бензин чачып өрттөдү
Фергана облусунун Багдад районунун 51 жаштагы жашоочусу 27 жаштагы уулуна бензин чачып өрт койгон. Башында атасы кылмыш болгон жерден качып кетип, кийинчерээк укук коргоо органдары тарабынан кармалган. Ууулунун денесинин 70% күйүп калган. Учурда дарыгерлер анын абалын оор деп баалашууда.
Күбөлөрдүн айтымында, ата-баланын ортосундагы жаңжал автоунаадан улам келип чыккан. «Атасы бир жакка барып келүү үчүн баласынын машинасын сураган. Бирок ал автоунаа өзүнө керек экенин айткан. Үй-бүлөнүн бир гана автомобили бар эле. Анан атасы жини менен бензини бар бөтөлкөнү уулуна чачып өрт койгон», –деди жергиликтүү жашоочулардын бири.
Бул факт боюнча “Адам өмүрүнө кол салуу” беренеси менен кылмыш иши козголду. Былтыр февралда Бухара шаарында 47 жаштагы жаран үй-бүлөлүк жаңжалдан кийин ата-энесине бензин чачып өрттөгөн окуя катталган.
