Ирак бийлиги күрт референдумунун жыйынтыктарын жокко чыгарууну талап кылды
Ирактын премьер-министри Хайдер аль-Абади күрт автономиясынын көз карандысыздыгы тууралуу референдумдун жыйынтыктарын жокко чыгарууну талап кылды. Добуш берүү жекшемби күнү Ирак Күртстанынын аймагында өткөн.
«Бул референдумду жараксыз деп таап, Конституциянын алкагында сүйлөшүүлөрдү баштоо зарыл. Биз референдумдун жыйынтыктары боюнча сүйлөшүүлөрдү эч качан жүргүзбөйбүз. Конституцияга ылайык, Күртстандын бардык аймактарында ирак мыйзамдарын колдонобуз», — деди Абади 27-сентябрда Ирактын парламент депутаттарынын алдында сүйлөп жатып.
Автономдук райондун шайлоо комиссиясы тарабынан жарыяланган добуш берүүнүн жыйынтыктарына ылайык, референдумга калктын добуш берүү укугуна ээ 72 пайызы катышып, алардын 92,7 пайызы автоном аймактын көз карандысыздыгын колдошкон.
Reuters агенттигинин маалыматына караганда, ал ортодо Ирактын парламенти Абадиге кайрылып, күрттөрдүн карамагындагы Киркук аймагына аскерлерди жөнөтүүнү жана андагы мунай кендерин көзөмөлгө алууну сунуштады. «Өкмөт Киркук аймагындагы кендерди Мунай министрлигинин көзөмөлүнө өткөрүшү керек», — деп жазылган парламент кабыл алган резолюцияда.
Түрдүү этностор жашаган Киркук району 2014-жылдан бери күрттөрдүн куралдуу пешмерга топторунун көзөмөлүндө. Анда ирак армиясы «Ислам мамлекети» экстремисттик тобунун жоочуларынын кысымына туруштук бере албай, аймактан чыгып кетишкен болчу.
