Эми Өмүрбек Текебаев менен Дүйшөнкул Чотоновдун сотунда 2010-жылдагы убактылуу өкмөттүн мүчөлөрүнүн көбү көрсөтмө бермей болушту. Мындай өтүнүчтү айыпталып жаткан тарап киргизип, сот канааттандырды.
Убактылуу өкмөт демекчи, Өмүрбек Текебаев абактан чыккандан кийин, бул жумада 9 жыл мурдагы революциядан кийинки маалда бийликте чогуу иштешкендер жолугушуу өткөрүштү. Ага үч мүчөсүнөн башкасынын баары катышкан. Салмактуу саясатчылардын башын бириктирген чогулушта эмне жөнүндө кеп козголгону ачыкталган жок. Бирок конкреттүү деле чечим кабыл алынбаса керек.
Убактылуу өкмөттүн мүчөлөрүнүн азыркы маалда чогулуп жатканы эмнеден кабар берет? Алар биригип бир күчкө айланышы мүмкүнбү? Өлкөдөгү саясий күчтөрдүн биригүүсү канчалык реалдуу?