Кыргыз-өзбек чек арасынан өткөндөр эки эсе көбөйдү
Кыргыз-өзбек чек ара тилкесиндеги өткөрмө бекеттерден ары-бери каттагандар эки эсеге көбөйдү. Бул тууралуу Мамлекеттик чек ара кызматынын маалымат бөлүмү кабарлады.
Анда айтылгандай, Ош облусундагы “Достук-Автожол” өткөрмө бекетинен суткасына 7000 киши өтүп жатат. Мурда бул жерде Кыргызстанга келе жаткандар жана Өзбекстанга бара жаткандар биригип 2-3 миңди гана түзчү.
Баткен облусундагы “Кадамжай-Автожол” өткөрмө бекетинде буга чейин суткасына 700-750 адам өтүп келсе, учурда 2000-2500 адам каттап жатат.
Ал эми Жалал-Абад облусундагы “Маданият-Автожол” өткөрмө бекетинен Өзбекстанга киргендердин жана Кыргызстанга чыккандардын саны 900-1000 кишини түзүүдө, мурда бул сан 350-500гө гана жетчү.
Эки өлкөнүн ортосунда каттам жанданганына байланыштуу чек ара кызматы бул бекеттерге кошумча текшерүү кабиналарын ачкан.
Кыргызстан менен Өзбекстандын мамилеси былтыртан баштап оңоло баштаган. Чек ара тилкелеринин 85% такталып, каттоо да жеңилдеген.
