«Муну айткан себебим – бул жерде чоң коррупциялык схема бар дешет. Тиешелүү органдар аларды калкалап, ошолордун жардамы менен алар жумушун кылып же кандайдыр бир башка иштер менен алектенип жүрүшөт. 100 миң адамдын ар биринен ай сайын 1-2 миң сом алса да 200 миллион сом акча болот», — деди депутат.
Тиллаев Кыргызстандын кылмыш-жаза мыйзамдарында сырттан келген мигранттардын жана туристтердин жоопкерчилигин караган нормалар жетишсиз экенин айтып, өкмөттү ушул маселеге көңүл бурууга чакырды.
Кыргызстандын өзүнүн миллиондон ашуун жараны учурда чет мамлекеттерде мигрант болуп жүрөт. Ошол эле учурда кийинки жылдары Тажикстандан, Өзбекстандан жана Кытайдан келгендер өлкө ичинде калып, иштеп жатканы, алар көбүнчө курулуш тармагында арзан жумушчу күч катары колдонулуп жатканы айтылып келатат.
Миграция мекемеси депутат Тиллаевдин айткандары боюнча азырынча комментарий бере элек.
