Анын айтымында, камералардын 965и убактылуу кармоочу жайларга, 327си сурак берүү жана адвокаттар менен жолугушуу бөлмөлөрүнө, 364ү коридорлорго, 161и камактагылар сейилдеген жерлерге, 307си абак имараттарынын айланасына жана 121и адамдарды текшерүү жайлары менен ашканаларга орнотулду. Министр бул жарандарды кыйноого алуу, аларга психологиялык жана физикалык жактан таасир этүү фактыларын алдын алуу чарасы экенин кошумчалады.
Маалыматка караганда, тергөөчүлөрдүн иш бөлмөсү менен тергөө абактарына көзөмөл камералары тергөөнүн жүрүшүндө мыйзамсыз аракеттерди болтурбоо максатында орнотулду. Ошол эле маалда бул айыпталуучулар менен адвокаттар тараптан тергөөчүлөргө карата негизсиз айыптоолордун айтылышын алдын алууга жардам берет.
Көзөмөл камераларын, мониторлорду жана серверлерди сатып алууга өлкөнүн Каржы министрлигинин алдындагы бюджеттен сырткаркы фонддон 5,2 миллиард сум (643 миң доллардан ашык каражат) жумшалганы кабарланууда.
