Президент пенсиялык камсыздоонун азыркы абалын талкуулады
Алмазбек Атамбаев Социалдык фонддун төрагасы Теңизбек Абжапаровду кабыл алды. Жолугушуунун жүрүшүндө мамлекет башчысына пенсиялык камсыздоонун азыркы абалы, пенсияларды каржылоо, камсыздоо төгүмдөрүнүн келип түшүүсү, ошондой эле аларды администрациялоо маселелери тууралуу маалымат берилди.
Социалдык фонддун төрагасы ошондой эле алдыдагы пенсиялардын жогорулатылышынын механизмдери туурасында дагы айтып берди. Жогорулатуунун аркасында пенсиялардын орточо көлөмү 520 сомго көбөйүп, 5517 сомду түзүп калат. Жетекчинин маалыматы боюнча 627 миң пенсионердин пенсияларын кайра эсептеп чыгуу аяктады, 2-октябрдан тартып жогорулатылган пенсияларды каржылоо башталат.
Алмазбек Атамбаев Социалдык фонддун төрагасына пенсиянын базалык бөлүгүн аныктоо нормасын жана индексациялоону кайрадан карап чыгып, тиешелүү сунуш киргизүү боюнча тапшырма берди.
Мамлекет башчысы кабыл алынган чаралар пенсиялык системаны кыйла адилеттүү болууга алып келээрин белгилеп, пенсионерлер алдында социалдык милдеттенмелерди өз учурунда жана толук көлөмдө аткарууну камсыз кылууга милдеттендирди.
