Саламаттыкты сактоо министрлиги Бишкекте ымыркайларды сатууга шектелип колго түшкөн дарыгерлердин ишин териштирүүнү баштады.
Эске салсак, өткөн жума күнү бала сатууга шектелип, Бишкектеги үй-бүлөлүк дарыгерлер борборунун 2 гинекологу кармалган. Айрым маалымат булактарында ал гинекологдор кармалган учурда биринин унаасында чарчап калган ымыркайлардын сөөктөрү болгону да кабарланууда.
Ички иштер министрлигинин басма-сөз кызматы кармалгандардын бири камакка алынганын билдирген болчу. Бирок бүгүн эки дарыгер тең үй камагына чыгарылганы белгилүү болду.
Ошондой эле, тергөөнүн кызыкчылыгы үчүн бул кылмышка шектүүлөрдүн аты-жөнү жана алар иштеген медициналык мекеме тууралуу маалыматтар азырынча ачыкталбай жатат.